Keńeste mıllıondaǵan azamattardyń múddesin qorǵaıtyn tórt negizgi baǵyt talqylandy: jazǵy týrızmdi damytý, balalar demalysyn uıymdastyrý jáne qaýipsizdigi, medısına qyzmetkerleriniń quqyqtaryn qorǵaý jáne mindetti áleýmettik medısınalyq saqtandyrý (MÁMS) júıesin qarjylandyrý.
Týrızm: qaýipsizdik, servıs jáne baqylaý
Ermek Kósherbaevtyń aıtýynsha, ishki týrızmdi damytý – Qazaqstannyń ekonomıkalyq saıasatynyń basym baǵyttarynyń biri. Bul rette qaýipsizdikke, qyzmet kórsetý sapasyna, sıfrlandyrýǵa jáne kórsetiletin týrıstik qyzmetterdiń ashyqtyǵyna erekshe nazar aýdarý qajet.
«Qazaqstan Respýblıkasy Premer-mınıstriniń tapsyrmasyna sáıkes aldymyzda naqty mindetter tur: týrızm salasyn sıfrlandyrý, ınfraqurylymdy jaqsartý, qyzmet kórsetý sapasynyń standarttaryn engizý, ınvestısııalyq tartymdylyqty arttyrý jáne sanıtarlyq ári etıkalyq normalardyń saqtalýyna baqylaýdy kúsheıtý. Bul baǵyttar ortalyq jáne óńirlik deńgeıde júıeli túrde júzege asyrylýy tıis. Azamattar men el qonaqtary úshin jazǵy maýsymnyń qandaı bolatyny osy úılesimdi jumystyń nátıjesine baılanysty. Biz formaldy tásilge jol bere almaımyz – eger týrızmdi óńirlik damýdyń shynaıy qozǵaýshy kúshine aınaldyrǵymyz kelse, júıeniń árbir tetigi tıimdi ári halyqtyń ıgiligi úshin jumys isteýi qajet», – dep atap ótti Premer-mınıstrdiń orynbasary.
Týrızm jáne sport vıse-mınıstri Erjan Erkinbaevtiń sózinshe mańyzdy mádenı, sporttyq jáne is-sharalardyń biryńǵaı kúntizbesi bekitilgen, is-sharalar týrıster keletin núktelerde QR-kodtar arqyly qoljetimdi ulttyq týrıstik portalǵa ornalastyrylǵan, alaıda keıbir óńirlerde bul tek formaldy túrde iske asqan, kýrorttyq aımaqtardyń bas josparlaryn sıfrlandyrý tek eki óńirde aıaqtalǵan, qalǵandary kesteden keshigýde.
Alakól kólinde sýdaǵy qaýipsizdiktiń joqtyǵy, sanıtarlyq talaptardyń buzylýy, qoǵamdyq qoljetimdiliktiń shektelýi jáne salyq tártibiniń saqtalmaýy sııaqty máseleler de kóterildi. Ermek Kósherbaevtyń tapsyrmasy boıynsha Týrızm jáne sport mınıstrligi basqa da tıisti organdarmen birge jaǵdaıdy tekserip, máselelerdi sheshý boıynsha usynystar ázirleýi tıis.
Shyǵys Qazaqstan oblysynyń oń tájirıbesi erekshe atap ótildi – munda týrızm basqarmasy qurylǵan, ınvestısııalyq jobalar júzege asyrylýda, onyń ishinde Rıdder qalasyndaǵy jyl boıy jumys isteıtin «Anataý» kýrorty bar. Bıyl mamyr aıynda oblysqa týrızm salasyna quıylǵan ınvestısııa kólemi ótken jyldyń sáıkes kezeńimen salystyrǵanda 86%-ǵa artqan.
Balalar demalysy: basymdyq – qaýipsizdik
Keńeste jazǵy demalys, balalardyń bos ýaqyty men jumyspen qamtylýy máseleleri de talqylandy. Oqý-aǵartý mınıstrliginiń málimetinshe, bıyl 3,2 mln bala jazǵy demalyspen qamtylmaq. Qazir 10 myńnan astam mektep janyndaǵy lager, 204 qala syrtyndaǵy ortalyq jáne 17 jyl boıy jumys isteıtin nysan qyzmet kórsetýde. Uıymdastyrýǵa 2500-den astam stýdent pen 800 erikti jumyldyrylǵan. Respýblıkalyq vedomstvoaralyq shtab qurylyp, sanıtarlyq jáne quqyq qorǵaý organdarymen ózara is-qımyl jolǵa qoıylǵan.
«3,2 mln balany jazǵy demalyspen qamtýdy josparlap otyrmyz. Qajetti jaǵdaılar jasalǵan: lagerler, jyl boıǵy nysandar jumys isteıdi, óńirlik shtabtar qurylǵan. Ár lagerge sanıtarlyq jáne quqyq qorǵaý mamandary bekitilgen. Túsindirý jáne oqytý jumystary júrgizilýde. Degenmen, táýekelder saqtalyp otyr, sondyqtan sanıtarlyq normalardyń saqtalýyna jeke jaýapkershilikti kúsheıtip, baqylaýdy arttyramyz. Balalar úshin jazǵy demalys mazmundy ári qaýipsiz bolýy tıis», – dedi oqý-aǵartý vıse-mınıstri Edil Ospanov.
Medısına qyzmetkerlerin qorǵaý – zań aıasynda. Ermek Kósherbaev medısına qyzmetkerlerine jasalǵan shabýyldarǵa alańdaýshylyq bildirdi. 2019 jyldan beri elde 161 osyndaı qylmys tirkelgen.
«Medısına qyzmetkerleri alǵysqa ǵana emes, naqty zańnamalyq qorǵaýǵa da laıyq», – dedi Ermek Kósherbaev.
Osyǵan baılanysty aıdyń sońyna deıin medısına qyzmetkerlerine qatysty zorlyq-zombylyq úshin qylmystyq jaýapkershilikti qarastyratyn Qylmystyq kodekske ózgerister engizý jónindegi zań jobasy Úkimetke usynylýy tıis.
MÁMS qarjylandyrý: baqylaýdy kúsheıtý
Áleýmettik medısınalyq saqtandyrý qorynyń derekterine sáıkes, keıbir óńirlerde qarajatty basqarýda buzýshylyqtar jáne maqsatsyz paıdalaný jaǵdaılary anyqtalǵan. Osyǵan oraı Vıse-premer densaýlyq saqtaý mınıstrligi men MÁMS qoryna júıe qarajatyna baqylaýdy kúsheıtý, maqsatty paıdalaný boıynsha aýdıt júrgizý, barlyq qarjylyq operasııalardyń ashyqtyǵyn qamtamasyz etýge qatysty birqatar tapsyrma berdi.
Keńes qorytyndysy boıynsha Ermek Kósherbaev jazǵy maýsymda halyqtyń qaýipsizdigi men ómir sapasyn arttyrýǵa baǵyttalǵan naqty tapsyrmalar júktedi. Týrıstik ınfraqurylym men balalar lagerleriniń jaǵdaıyna baqylaýdy kúsheıtý, sanıtarlyq jáne órt qaýipsizdigin qamtamasyz etý, kýrorttyq aımaqtardy sıfrlandyrý men týrıstik qyzmetterdi fıskalızasııalaý jumystary jandandyrylmaq. Sonymen qatar medısına qyzmetkerleriniń quqyqtaryn qorǵaý men MÁMS qarajatyn tıimdi paıdalaný máseleleri jiti nazarda bolady. Barlyq sharalar azamattar úshin qaýipsiz jáne jaıly orta qalyptastyrýǵa, sondaı-aq áleýmettik salany júıeli túrde damytýǵa baǵyttalǵan.
